Пракуратура Наваполацка адмаўляецца прыцягваць да адказнасці фашыстоўцаў
- 8.04.2009, 15:31
Улады Наваполацка дазваляюць фашыстоўцам беспакарана маляваць свастыкі на будынках гораду і шкодзіць маёмасць праваабаронцы Змітра Салаўёва.
Напрыканцы студзеня 2009 года праваабаронца Зміцер Салаўёў атрымаў адказ з пракуратуры горада на сваю заяву, сутнасць якой тычылася фактаў нанясення фашыстоўскай сімволікі на будынках Наваполацку, паведамляе праваабарончы цэнтар «Вясна».
У адказе паведамлялася, што супрацоўнікамі Наваполацкага ГАУСу была праведзеная праверка, у выніку якой у ўзбуджэнні крымінальнай справы па факту нанясення фашыстоўскай сымболікі на будынкі і збудаванні Наваполацку было адмоўлена. Ва ўзбуджэнні адміністрацыйнай справы таксама было адмоўлена, бо «супрацоўнікі міліцыі не знайшлі асобаў, якія здзейснілі фашыстоўскія надпісы». У адказе было пазначана, што «супрацоўнікі міліцыі правялі прафілактычныя гутаркі з нейкімі асобамі».
Між тым, дзеянні невядомых асобаў, якія малююць свастыкі на будынках Наваполацка, працягваюцца. Толькі за апошні месяц свастыкі былі намаляваны ў пераходзе з вуліцы Дружбы ў двор дома па Дружбы, 6, на будынку універсітэта з боку СШ №3, на краме кветак на прыпынку «4-я школа», на супрацьлеглым баку на кіёску на гэтым прыпынку (апошнія дзве былі хутка замаляваны камунальнымі службамі).
Паколькі неўстаноўленыя асобы ў гэты час размалявалі свастыкай і памяшканне, якое належыць праваабаронцу Змітру Салаўёву на праве ўласнасці, ён паўторна звярнуўся з заяваю да пракурора горада Наваполацка.
«5-6 сакавіка 2009 года невядомыя асобы намалявалі вялікую свастыку на вонкавай сцяне ля вакна памяшкання па адрасе Алімпійская 2, г. Наваполацк, якое належыць мне на правах уласнасці. Яшчэ адна свастыка меншая па памерах была намалявана на ахоўным ралеце вакна майго памяшкання. Сам ралет быў пашкоджаны ў дзвюх месцах нейкім вострым прыстасаваннем. Гэта ўжо паўторнае нанясенне фашысцкіх сімвалаў на дадзены будынак. Першы адбыўся 25 снежня 2008 г», - паведамляе юрыст.
Зміцер Салаўёў запатрабаваў ад пракурора ўзбудзіць крымінальную справу па артыкулах 339 «Хуліганства», 130 «Распальванне расавай, нацыянальнай ці рэлігійнай варожасці ці розні» Крымінальнага Кодэксу Рэспублікі Беларусь па фактах нанясення невядомымі асобамі фашыстоўскіх сімвалаў (свастыка) на будынках і збудаваннях у горадзе Наваполацку, а таксама правесці прафілактычныя мерапрыемствы ў горадзе па прадухіленні злачынстваў накіраваных на распальванне расавай і нацыянальнай варожасці».